Шығыс Қазақстан облысының тұрғынына Instagram желісіндегі жазбасы үшін айыппұл салынды. Бұл туралы Stan.kz ақпарат агенттігі хабарлайды. 

Фото: freepik.com

Алтай аудандық сотының мәліметінше, әйел жалған ақпарат таратқаны үшін кінәлі деп танылған.

Шығыс Қазақстан облысының тұрғыны 2022 жылдың шілде айынан бері Алтай қаласындағы дәмханада аспаз болып жұмыс істеген. 2023 жылдың қарашасында дәмхана басшысы әйелді жұмыстан шығарып жіберген. Осыдан кейін бұрынғы қызметкер ашулы күйде Instagram парақшасында дәмхананың лас жағдайларда жұмыс істейтінін айтып видео жариялаған.

2024 жылдың қаңтарында дәмханада тексеру жүргізіліп, нәтижесінде видеода көрсетілген уәждер расталмаған және ешқандай заң бұзушылықтар анықталмаған. 

Сот отырысында азаматша өз кінәсін мойындап, әлеуметтік желідегі жазбасын өшіріп тастағанын айтты. Айыпталушы соттан өзіне әкімшілік айыппұл түріндегі жаза қолдануды сұрады.

Сот айыпталушыға 180 айлық есептік көрсеткіш көлемінде (664 560 теңге) әкімшілік айыппұл салды. Сот жазаны жеңілдететін және ауырлататын мән-жайлардың жоқтығын ескере отырып, айыппұлды 30 пайызға азайтты. Нәтижесінде айыппұл көлемі 434 700 теңгені құрады.

Еске салсақ, бұған дейін Алматы мәслихатының отырысында боқтап жіберген депутатқа айыппұл салынғаны туралы жазған едік.


Автор: Айгерим Жумабаева

Айгерим — опытный редактор с богатым опытом в изучении и письме о культуре и истории. Ее страсть к языкам и письму помогает создавать увлекательные тексты.