Белгілі сазгер, композитор Арман Бексұлтанның ұлының басы дауға қалды. Ол көлік бизнесін дамытамын деп шығынға ұшырап, халықтан жинаған ақшаны қайтармай кеткен. Бұл туралы Stan.kz ақпарат агенттігі “Көреміз” бағдарламасына сілтеме жасап хабарлайды. 

Фото: Бағдарламадан скриншот

Жұрт несиеге автосалоннан жаңа көлік алып, Жандос Арманұлына тапсырған. Ол көлікті жалға беріп, көлік иелерінің несиесін жаппақшы болған. Алайда несие де төленбеген, көлік те жоқ. 

“Жалпы шығын – 75 миллион теңге”

“Сіңлім мен күйеуі және мен бас-аяғы 3 көліктен айырылып отырмыз. Үшеуін де несиеге алып едік. Жалпы шығын – 75 миллион теңге. Бізді құда баламыз, Жандоспен таныстырды. “Оның таксопаркі бар. Сол кісілермен бірге көлікті жалға береміз, әрі содан түскен ақша көліктің несиесін жабады. Сіздерге ешқандай салмақ болмайды” деп сендірді. Тіпті, Жандостың әкесі танымал сазгер, “Музарт” тобының әндерін жазған композитор дегесін сендік. Келісімнен кейін бізге үшеуімізге де “рақмет” есебінде 1 миллион теңгеден сыйақы берді. Біз басында қарсы болғанбыз, бірақ Жандостың отбасылық бизнесі дегесін сендік. Менің несием 5 ай ғана төленді, сіңлім мен жолдасының несиесі 2 ай ғана төленді. Соны білгеннен кейін бұл істе шикілік барын сездік”, –дейді жәбірленуші Айман Әбілқасымқызы.

                     “10 көлікті атымызға жаздырдық”

Жауаптан жалтармай, ұлының бизнесінің мән-жайын түсіндірмек болып, студияға сазгердің өзі келді. 

“2021 жылы көлік бизнесін бастағым келеді деп осы кәсіпті қолға алған еді. ”Осы шу басталардан бір күн бұрын ұлыммен сөйлестім. Ол бизнесінің тұралап қалғанын айтты. Негізі отбасылық бизнес болсын әрі ұлымды қолдайын деп әйелім екеуміз 10 көлікті атымызға жаздырдық. Ешқандай арам ойымыз болған жоқ. Жалға алған көліктерінің бәрін төлей аламын деді. Сол кезде мобилизация болып, ресейліктер де біраз көлігін сұраған. Солай оның бизнесі аяққа тұрып кетті. Жәбірленушілер секілді біз де 10 көлігімізден айырылып отырмыз. Кеше естідім, осы күнге дейін ұлым 180 миллион теңге несие төлеп келген. Жалға берген көліктерінің ақшасын несиеге құйған”, – дейді сазгер.

                “Ұлымды полиция қызметкерлеріне өзім апарып бердім”

Айтуынша, ұлының қасында тағы бір бейтаныс жігіт болған. Сол жігіт пайда болғалы баласының бизнесі шығынға ұшыраған. 

“Ұлыма қазір жан-жақтан қысым болып жатыр. Бизнесі басталғалы Арман деген жігіт қасынан шықпайтын болды. Бұрын-соңды достарының ішінде Арман деген жігіт болмаған. Осы істі бүлдіруге келген сияқты деп ойлаймыз. Қазір сол жігітті іздестіріп жатырмыз. Атыма жазылған 3 көліктің бірі Шымкентте жүр. Кеше жылдамдықты асырғаны үшін айыппұл келді. Әйелімнің атында 6 көлік бар. Қызымның атына 1 машинаны жаздырдық. Ұлымның атына шағым түсіргеннен кейін, құзырлы органдарға өзім апарып тапсырдым. “Сендердің іздейтін адамдарың осы жігіт” деп айтып кеттім. Істің ақ-қарасын ажыратамыз. Халықтан ұят болды. Балам қолымен істегенді мойнымен көтереді”, – деп ақталды сазгер. 

Сонымен қатар алданғандар арасында өнер иелерінің балалары да бар болып шықты. 

“Нұрлан Еспановтың ұлы да бар. Олжас пен Жандос бірге өскен. Ол 1 көлікті несиеге алған. Кейін ақша түсе бастағасын 2 көлік рәсімдеген. Қазір бірдеңе деу қиын. Құзырлы органдар жақсы жаңалық айтар деп үміттеніп отырмын. ”, – дейді Арман Бексұлтан. 

Бағдарлама соңында, заңгерлер жәбірленушілерге құқықтық кеңес беретін болды. 


Автор: Гульжан Оразбаева

Гульжан — исследовательница жизни и достижений знаменитых личностей Казахстана. Ее статьи позволяют читателям взглянуть на страну через призму вкладов ее ярких представителей.