Маңғыстаулық кардиохирургтар арықтауға арналған дәрі ішіп, жүрегі тоқтап қалған 30 жастағы науқасты аман алып қалды. Бұл туралы Stan.kz ақпарат агенттігі Lada.kz сайтына сілтеме жасап хабарлайды. 

Фото: doctorbormental.ru

Желтоқсанда жас әйел аурухананың қабылдау бөліміне өте ауыр хәлде "жүрек жеткіліксіздігі" диагнозымен түсті. Науқастың қан қысымы күрт төмендеп, кардиогенді шок алған. Ультрадыбысты зерттеу кезінде дәрігерлер жүректің жиырылу қабілеті төмендегенін анықтады.

"Ата-анасының айтуынша, науқас "Молекула" атты арықтататын дәрі ішкен. Біз дәрі жүрекке әсер етті деген қорытындыға келдік. Себебі салмақ тастауға арналған дәрі-дәрмек құрамында жүрек-қан тамырларын әлсірететін "сибутрамин" деп аталатын зат бар. Науқастың қан қысымын қалыпқа келтіре алмағаннан кейін біз оны тез арада жасанды жүрек-өкпе құрылғысына және механикалық желдету аппаратына қостық. Соның арқасында қан қысымын 70-ке дейін көтердік", — дейді кардиохирург дәрігер Абунасыр Суханов.

Жасанды жүрек-өкпе құрылғысы науқастың денесінде бір апта тұрды. Емдеу кезінде қан қысымы да қалпына келді. Оянғаннан кейін әйел аппараттардан ажыратылды. Қазір науқастың жағдайы жақсы.

Анасы дәрігерлерге қызын аман алып қалғаны үшін алғыс айтты.

"Мұның бәрі дәрігерлердің шеберлігі мен біліктілігінің арқасында болды. Операция тегін жүргізілді. Мен аурухана басшылығына, кардиохирургия, реанимация бөлімшесінің дәрігерлеріне, орта және кіші медицина қызметкерлеріне алғысымды білдіремін", – деді әйел.

Мұндай шұғыл операциялар медицина көмегінің кепілдік берілген көлемі шеңберінде, ал жоспарлы операциялар міндетті әлеуметтік медициналық сақтандыру жүйесі бойынша жүргізілетінін еске сала кетейік. 


Автор: Жанара Кенжебекова

Жанара — исследовательница культуры и традиций. Ее статьи поднимают важные темы многообразия культур Казахстана.