Теріскейде 1 тонна көмір құны 20 мың теңгеге дейін жеткен. Қымбатшылық баспаналарын көмірмен жылытатын тұрғындарды қыспаққа алды. Олар мұндай баға қалтамызға салмақ түсіреді деп отыр. Ал бәсекелестікті қорғау және дамыту департаменті үш тасымалдаушыға қатысты тексеріс бастады. Бұл туралы Stan.kz ақпарат агенттігі Информбюро 31 телеарнасына сілтеме жасап хабарлайды. 

Нұрлан Әбішев мектепте күзетші болып жұмыс істейді. Айына 90 мың теңге табыс табатын жігіт ағасы бір қыста баспананы жылыту үшін 150 мың теңге жұмсайтынын айтады. Оған 5 тонна көмір, үш текше метр отын алып көктемге дейін әрең жеткізеді екен. 
"Қатты отынның сапасы нашар, отқа салсаң жанбайды. Сөйтіп, үйіміз де дұрыс жылынбайды", — деп налиды ол. 

Қысы қатты өңірде қатты отын бағасы жаңа жылдан бастап 15 пайызға көтерілген. Яғни, көмірдің бір тоннасы бірден 2 мың теңгеге өсті. Мәселен солтүстікте сұранысқа ие Қаражыра мен Шұбаркөл көмірінің бір тоннасы 19 мың теңгеден асады. Халық бұл біздің қалтамызға салмақ түсіреді дейді. 

Костенко шахтасындағы қайғылы оқиғаға кінәлі деген айыппен 9 шенеунік қамауға алынды

"Көмір бағасы 15 пайызға дейін өсті. Ал зейнетақы бар болғаны 7 пайызға көтерілді. Бұл зейнеткерлердің қалтасын қағады. Өмірдің қызығын көрмей, қиналып күн кешеміз", —  дейді Петропавл тұрғыны Нина Рубанова. 

Ал тасымалдаушылардың айтуынша, қатты отынның бағасын көмір кеніші көтерген. Жеткізу қызметі де арзан емес дейді олар. 
Ал бәсекелестікті қорғау департаменті аймақта Шұбаркөл, Қаражыра және Майкүбе көмірін сататын кәсіпкерлерге қатысты тексерісті бастағандарын жеткізді. 

"Көмір бағасының өсуіне, біріншіден кен орындарында сатып алу бағасының көтерілуі және көмірді тасымалдау бойынша шығындарының артқаны себеп болған. Олардың қатарында теміржол тарифтерінің, көмірді тасымалдайтын локоматив қызметі бағасының өсуі, сондай-ақ жылдан жылға еңбекақы көтеріліп жатқаны бар. Осының бәрі жиналып көмір бағасының өсуіне әкеліп соқты", —  деп атап өтті облыстағы бәсекелестікті қорғау және дамыту департаменті басшысының міндетін атқарушы Аслан Әліпбаев. 

Мамандар үш ай бойы тасымалдаушылардың әрекетіне талдау жүргізбек. Тергеу жұмыстарының нәтижесінде кәсіпкерлердің бағаны негізсіз өсіргені дәлелденсе, оларға қомақты айыппұл салынады.
 


Автор: Айгерим Жумабаева

Айгерим — опытный редактор с богатым опытом в изучении и письме о культуре и истории. Ее страсть к языкам и письму помогает создавать увлекательные тексты.