Премьер-министр қызметіне Олжас Бектенов бекітілгеннен кейін үкіметте бірқатар ауыс-түйістер басталды. Бұрынғы министрлердің біразы өз лауазымында қалды. Соның бірі – Роман Скляр. Ол Қазақстан премьер-министрінің бірінші орынбасары қызметіне қайта тағайындалды. Бұл туралы Stan.kz ақпарат агенттігі хабарлайды.  

Фото: mn.ru

Роман Васильевич Скляр 1971 жылғы 8 мамырда Павлодарда дүниеге келген. Павлодар мемлекеттік университетін инженер-құрылысшы мамандығы бойынша, сондай-ақ, Мәскеу қазіргі заман бизнес институтын экономист мамандығы бойынша және Қазақ құқықтану және халықаралық қатынастар институтын заңгер мамандығы бойынша бітірген.

  • Еңбек жолын 1989 жылы "Экибастузуглеавтоматика" монтаждау-жөндеу басқармасында слесарь-монтажшы қызметінен бастаған.
  • 1989-1990 жылдары "Қазпромтехмонтаж" шаруашылық-монтаждау басқармасының монтаждаушысы, 1990 жылдан бастап "Вахинвест" бірлескен кеңес-батыс-герман кәсіпорнының қауіпсіздік жөніндегі инженері болды.
  • 1990-1999 жылдары "Ансат-Павлодар" ЖШС коммерциялық бөлімінің бастығы, директордың орынбасары, бас директор қызметтерін атқарды. 
  • 1999-2002 жылдары "Тыныс" ЖШС директоры, 2002-2003 жылдары Қазақстан Республикасы Қаржы министрлігінің дәрменсіз қарызгерлермен жұмыс комитеті Павлодар облысы бойынша басқармасының бөлім бастығы болды.
  • 2003-2005 жылдары Павлодар қаласы мемлекеттік сатып алу басқармасының бастығы, 2005 жылғы қантардан бастап Павлодар облысы әкімінің бас инспекторы, 2005 жылғы сәуірден бастап Павлодар облысының әкімі аппаратының басшысы, 2006 жылдан бастап Павлодар қаласы әкімінің орынбасары болды.
  • 2006-2007 жылдары Астана қаласының әкімі аппаратының инфрақұрылымды дамыту бөлімінің меңгерушісі, 2007-2008 жылдары Астана қаласының Энергетика және коммуналдық шаруашылық департаментінің директоры, 2008-2010 жылдары Павлодар облысы әкімінің орынбасары, 2010-2011 жылдары Павлодар облысы әкімінің бірінші орынбасары, 2011-2013 жылдары Қазақстан Республикасының көлік және коммуникация вице-министрі, 2014–2016 жылдары "Қазақстан Темір Жолы" АҚ вице-президенті қызметтерін атқарған.
  • 2016 жылдан бастап Қазақстан Республикасы мәжілісінің депутаты, ҚР парламенті Мәжілісінің Экономикалық реформа және өңірлік даму комитетінің төрағасы болды.
  • 2016 жылғы мамырдан бастап Қазақстан Республикасының ұлттық экономика вице-министрі, 2016-2019 жылдары инвестициялар және даму бірінші вице-министрі болды.
  • 2019 жылғы ақпаннан бастап Қазақстан Республикасының индустрия және инфрақұрылымдық даму министрі қызметін атқарған.
  • 2019 жылғы 18 қыркүйектен бастап ҚР президентінің жарлығымен ҚР премьер-министрінің орынбасары болып тағайындалды. 2021 жылы 18 қаңтарда ҚР Президентінің жарлығымен осы қызметіне қайта тағайындалды.
  • 2022 жылғы 11 қаңтарда ҚР президентінің жарлығымен Қазақстан Республикасы премьер-министрінің бірінші орынбасары болып тағайындалды.

Айта кетейік, бұған дейін Қазақстан Республикасы президенті әкімшілігінің басшысы лаузымына Айбек Дәдебаев және премьер-министрдің орынбасары – үкімет аппаратының басшысы болып Ғалымжан Қойшыбаев тағайындалғанын жаздық.

Сонымен қатар Азамат Несіпбайұлы Есқараев әділет министрі қызметіне және Тамара Дүйсенова премьер-министрдің орынбасары қызметіне қайта тағайындалғанын жазған едік. 


Автор: Жанара Кенжебекова

Жанара — исследовательница культуры и традиций. Ее статьи поднимают важные темы многообразия культур Казахстана.