Отандық киноларда бой көрсетіп, танымалдылыққа ие болған актер, спортшы Еркебұлан Тоқтар ел білмейтін құпиясын айтты. Бұл туралы Stan.kz ақпарат агенттігі хабарлайды. 

Фото: https://www.instagram.com/erkebulan_toktar/

Актердің айтуынша, ол ойынқұмар болған. 

“Осыдан үш жыл бұрын өмірімнің мәнісі қалмағандай еді. Жастардың тілімен айтқанда “қораға” кірдім. Бәрі ставка тігуден басталды. Жарты жыл бойы ұтып, анау-мынау шығыныма, таксиге төлейтін ақшамды тауып жүрдім. Бірақ бірте-бірте "қадала" бастадым. Еңбекпен тапқан ақшамды салып, кейін несиеге кіре бастадым. Банк бермейтін болғасын, ақырындап микрокредиттік ұйымдарға бас сұқтым. Кім береді, солардың бәрінен алғанмын. Әлі есімде,  желтоқсан айы еді, соңғы рет микрокредиттік ұйымнан 60 мың теңге берді. Соны 20 мың теңгеден үш рет салып, ұтылып қалдым. 9 желтоқсан мамамның туған күні еді. Сыйлық беруге бір тиын ақшам жоқ.  Өзімді сорлы адам сезіндім. "Қандай адаммын мен, әке-шешеме ел қатарлы сыйлық бере алмадым, інілеріме дені дұрыс аға да боп жарытпадым" деп күйіндім. Содан өзімді қолға алам деп, іштей серт беріп, спортпен айналыса бастадым”, – дейді актер. 

  • OLIMP KZ букмекеріне қатысты тағы бір күдікті Сербиядан экстрадицияланды

  • Қазақстанда "1Win" онлайн-казино ұйымдастырушыларының үстінен қылмыстық іс қозғалды

Өнер иесінің айтуынша, құмар ойынның құдығынан 3-ақ нәрсе алып шыққан. 

“Жаттығу залына барғым келді. Ол жаққа бару үшін ақша керек. Сол үшін тегін жаттығатын зал іздедім.

Сырым досым "кел, тегін жаттық" деді. Бірақ оған бару үшін де жолға ақша керек. Айдын Жұмахан деген әнші досымды бірге жаттығуға үгіттеп, соның машинасымен барып жүрдім. Бірте-бірте тіл үйрендім. Одан кейін дінге қызықтым. Спортта әжептеуір жетістікке жете бастадым. Үш айдан кейін медиа-боксқа қатысу туралы ұсыныс түсті. Бір украиналық боксшыны жеңіп, содан мені үлкен ағалар назарға алып, бірге жұмыс істеуге ұсыныс білдірді. Келісімшарт жасаса бастадық. Солай мен алдыңғы қарыздарымды жауып, қалыпты өмірге қайта оралдым. Бұл видеомен айтқым келген нәрсем, қандай қиындыққа тап болсаңдар да еңбек пен әрекет керек. Өміріңнің түбіне келіп, тіреліп тұрсаң да берілме, біліміңді шыңдап, тығырықтан шығудың жолын қарастыру керек", – деп кеңес айтады спортшы. 

Желі қолданушылары құмар ойынның құрсауында жүрген таныс-достарын айтып, көмектесуін өтініп жатыр. “1 миллион 400 мың теңге қарызда жүрмін. Осы іс-әрекетіме өкінемін ”, “Ерік-жігерің мықты екен”, “Адам өзін өзгертпейінші, өмірі өзгермейді”деген пікір көп. 


Автор: Гульжан Оразбаева

Гульжан — исследовательница жизни и достижений знаменитых личностей Казахстана. Ее статьи позволяют читателям взглянуть на страну через призму вкладов ее ярких представителей.