Мургни Нутэнут



жүктеу 1.94 Mb.
бет1/11
Дата22.02.2019
өлшемі1.94 Mb.
  1   2   3   4   5   6   7   8   9   10   11


Мургин Нутэнут. Наш край. № 2, 05.10.2001 г.

(Специальное приложение к газете «Крайний Север»).


С. 1
Рэнымкэвыркыниӈыт ӈэлвыльыт - манэмынгыквыт нэмыӄэй
Ӈэргэрык ӈэранъылёӈэт Анадырык гумэкэтлинэт эрмэт сельхозпредприятияткокэн округкэн. Ынкы гатвален ымы губернатор Чукоткакэн Роман Абрамович.

Умэкэтыльэ ганынныкалейпатленат договортэ мигчирвинрэткин. Договорыгъет сельхозпредприятиярык вэты рымкавъёлӄылтэ ӈэлвыльыт ӈутингивик 5процентальо, яврэна – 15. Ыныкит хозяйстворык нэрэнкытвылевыркынэт энатваттэ, правительствота Чукоткакэн раманэмынгыквыркынэнат директортэ, специалистат ынкъам

ӄорагынрэтыльыт. Договорык лымӈэ гэныгйивэтлин, миӈкэмил мыкэльын тэкичгын рывэлытковъёлӄыл хозяйстворык округэты, ръаяанаӈат, тылечьымытӄымыт, тылячьыяанаӈат, мигчирэвиръыт рыпкэратъёӄылтэ хозяйствоткогты правительствота Чукоткакэн.

Губернатора Роман Абрамовичына энмэч кылямгонэнат нынныкалейпатъёттэ договортэ. Тэӈвытку, галяк ыннанмытлыӈэн гивиӈитти,

намынгыкватыӈӈонат ӄорагынрэтыльыт. Мынгыкво гаталенат мыкыӈ 52-к

миллионтэ рублти.

Мынъатчагъан тэлпыльын гивиӈит. Эплеэн-ым, миӈкэмил рэнъататъяаӈыт мургинэт ӄорагынрэтыльыт. Миӈкэмил лымӈэ ӈаргынэн

ратвагъа. Итык-ым чит ныӄитпыӄинэт чавчыват.

Корр. «МН».
В номере
Увеличишь стадо - получишь больше - 1 стр.

2 стр. - Памяти Клавдии Геутваль и Сергея.

Вести - 2 стр.

Праздники оленных людей - 3 стр.

Кто был раскулачен? (на русском языке) - Материалы на эвенском языке - 3 стр.

Теркигина - 4 стр.


С. 2
Панэна ытлён ӈалвыльыӈӄач варкын, оратвальын итык бригадиро совхозык «Турваургин» Билибинкэн районкэн. Гинэнпиривлин нымкыӄин ордена. Инъэтэтыльын ӄорагынрэтык тэленъеп таӈэргыпатыркын, лымалё нэлгыркын нутэтумгэ. Нынны ынин Мельников Николай (виилыгтык льуркыниткы).
Ръапыӈыл?
Ӈэргэрръук ӈирэӄ ӄорагынрэтбригадак Провидениякэн муниципальныкэн сельхозпредприятиен – Энмыльыкэн ынкъам Нунлыгрэкин – экимитъыкэ гэнъэтлинэт. Нивӄинэт, амӄоратъоля гэнъэтлинэт эмнуӈыльыт. Лымӈэ уйӈэ асапогка, аяанаӈка танкавӈынво ӈалвыльыляйвынвыкэн гуйгуӄэгти. Трактор гакэмэтъыма ӈэранбригадагты эквэтыльылӄыл.

Турэрмэрык Чукоткакэн районкэн эӈъэлю нэлгыркынэт вагыргыт сельхозпредприятияткок ынӈэнӄачкэн. Панэна еп экономика люӈынулвэвэ, ӄэйвэ алымы хозяйствот нэмэчвинрэтыркынэт манэта округгыпы, ы’твэ, тылечьэ, милгэрэ, мъэмитэ, ӄутти. Эрмэтэ районкэн администрациен Михаил Зеленскийына румэкэвыйгут рыннинэт эрмэт сельхозпредприятияткокэн ынкьам администрацияткокэн нымнымкин ынкъам вэты вэтгаво лыӈык ӄорагынрэтгыргын ынкъам рэӄовфермат, тэнкэвӈык ынкэкинэт вагыргыт.

Ивылтикин районык ынӈытэӄ гантомгавлен государственныкэн ӄорагынрэткэн хозяйство «Полярник». Ынкы директоро итыркын Алексей Писарев, мэӈин гэмигчирэтлин главный зоотехнико советкэн хозяйствок нэмыӄэй тывъё «Полярник». Ӄорагынрэтыльыт ринъэтэнӈыркыт рэнымкэвӈык ӈэлвыльыт чиниткин хозяйствок. Ыргынан виин наранпаавӈынат ӄэтвык ӄаат, иӈӄун мыкыӈ нынъэлынэт. Эчвэра ринъэтэнӈыт, ӄэлюӄ яачыӈкэн гивик ырыкы наратыӈӈонат яанаӈат, ымы намынгыквыӈӈонат мурык нъэлык элвэльин губернатор.

Корр. «МН».


«Раскулаченные оленеводы, морзверобои Чукотки в Советское время»
Уатхэу (3066 оленей) – Чаунский район (междуречье Кувета и Пегтымеля)

Пеляургин (3300) – Чаунскийрайон (междуречье Кувета и Пегтымеля)

Готхыргин (1712) – Чаунскийрайон (междуречье Кувета и Пегтымеля)

Куке (2200) – остров Айон

Омринват (3000, 2 жены, 9 чел., 14 хозяев-помощников) – бассейн реки

Анадыря


Кельтык (олени) – бассейнАнадыря

Киляв (олени) – бассейн Анадыря

Апель (олени, хозяева-помощники: Лелек - 4 оленя, Пэлянгу - 31олень, Тинеута – 180 оленей, Эттегаургин – 57 оленей, Уленек

– 33 оленя, Райнаутегин – 20 оленей) – Амгуэмская тундра

Киляко (2800, помощники – Выкулькот, Кено, Тумкар, Теменикай, Ранрыгин, Ийке)

Папуле (2700, 8 хозяйств-помощников)

Вени-Леле (1000-1500оленей) – Восточная тундра Чукотки (Островное).

Окко (1000-15000) –Восточная тундра Чукотки (Островное)

Околь (1000-1500) – Восточная тундра Чукотки (Островное)

Окулю (1000-1500) –Восточная тундра Чукотки (Островное)

Рультувъе (1000-1500) – Восточная тундра Чукотки (Островное)

Вуатагин (олени) – Чаунский район

Нанвилгот (олени) – Чаунский район

Готхыргин (олени) – Чаунский район

Олель (олени) – Амгуэмская тундра

Гыргольтагин (олени, шаман) – Мечигменская тундра

Араро (четыре стада оленей, помощники – эвены) – Западная тундра Чукотки

Архип (30 оленей) – Мухоморненская тундра Анадырского района, чуванец

Малков (купец) – с. Усть-Белая, русский

И.Алин (купец-посредник) – район рек Анадыря и Белая, камчадал

И. Брагин (купец-посредник) – район рек Анадырь и Белая, камчадал

Е. Дьячков (купец-посредник) – район рек Анадырь и Белая, камчадал

П.Косыгин (купец-посредник) – район рек Анадырь и Белая, камчадал

Алитет (купец-посредник, два агента, три жены) – Чукотка (село Энмакай)

Шаман Аккр (лежбища моржей) – остров Аракамчечен

Гемауге (владелец вельбота) – ВосточнаяЧукотка

Ипяк (владелец вельбота) – ВосточнаяЧукотка

Сан-Браун (владелец вельбота) – ВосточнаяЧукотка

Колянто (5000 оленей) – Марковский район

Айван (70 оленей) – Туманская тундра

Тмере-Рольтыргин (1000-1500 оленей) – Островное

Ечанто (1000-1500 оленей) – Островное

Уватагин (олени) – Чаунскийрайон, Ичунь

Карауге (олени) – Чаунскийрайон, Ичунь

Тыгрерыргин (олени) – Чаунский район, Ичунь

Камергин (олени) – Чаунский район

Темпеляо (олени, посреднич. торговля) – Усть-Белая

Тынескин (олени) – Анадырский район, Вилюй, Усть-Бельская тундра

Тынелькут (олени) – Анадырский район, Вилюй

Тыкильку (олени) – Анадырский район, Вилюй

Тамени (олени, шаман) – Чукотскийрайон, Лорино

Теуль (олени, шаман) – Чукотский район, Лорино

Эттено (олени, шаман) – Чукотский район, с. Чульхен

Олеле (олени) – Чукотский район, Лорино

Таюге (олени) – Чукотскийрайон, Лорино

Анкауге (олени) – Чукотский район, Лорино

Хотлю (олени) – Чукотский район, Лорино

Апуле (олени, шаман) – Колючинская тундра

Анкай (олени, шаман) – Колючинская тундра

Тынялин (олени, шаман) – село Сердце-Камень

Нунегнилян (олени, шаман) – Наукан

Коравъе (олени, шаман) – село Шелагский

Ваннакат (олени, шаман) – Чаунский район

Кукену (олени) – Чаунский район

Тэнэнькау (олени) – Чаунский район

Тнэт (олени) – Чаунский район

Имринеут (олени, шаман) – Чукотский район, Инчоун

Тенетегин (олени, шаман) – Чукотский район, Инчоун

Тынтен (олени) – Анадырский район, Усть-Белая

Гелю (олени) – Анадырский район, Усть-Белая

Тненкау (олени) – Анадырский район, Усть-Белая

Ятыргин (олени) – Чукотскийрайон (Пильхино-Рыркайпий)

Митивтегин (олени) – Чукотский район (Пильхино-Рыркайпий)

Пытто (олени) – Чукотский район (Пильхино-Рыркайпий)

Метенаургин (олени) – Чукотский район (Пильхино-Рыркайпий)

Тынакыргын (олени) – Чукотский район (Пильхино-Рыркайпий)

Тынерультын (олени) – Чукотский район (Пильхино-Рыркайпий)

Кероль (олени) – Чукотский район (Пильхино-Рыркайпий)

Тырко (олени) – Чукотский район (Пильхино-Рыркайпий)

Ульвене (олени) – Чукотский район (Пильхино-Рыркайпий)

Тынет (олени) – Чукотский район (Пильхино-Рыркайпий)

Гелю (олени) – Чукотский район (Пильхино-Рыркайпий)

Геманькау (олени) – Чукотский район (Пильхино-Рыркайпий)

Натаквун (олени) – Чукотский район (Пильхино-Рыркайпий)

Укваутагин (олени) – Чукотский район (Пильхино-Рыркайпий).

И.С. ГАРАУСОВ. «Социалистическое переустройство сельского и промыслового хозяйства Чукотки (1917-1952 гг.)/ Магаданское книжное издательство, 1981. Подготовил к печати Петр Меркер (г. Анадырь).

(Окончание следует)
С.3 уйн’э
С. 4
Мынкэтъонат

Гэутваал
Гэутваал Клавдия Ивановна ынӈытэӄ ӈэргэрык пэлӄэтгъи. Ытлён гъурэтлин 1930 гивик эмнун’кы Чаакэн районык. Гэкэлиткулин партшколак Анадырык. Гэмигчирэтлин АКБэк совхозкэн «Певек». Гитлин председателё Ырыткучьыкин сельсоветык. Ынинэт грэпыт, стихыт, лымн’ылтэ гакалейпатленат газетак ынкъам альманахык «На Севере Дальнем». 1985 гивик Магаданык гэтэйкылин ынин кэликэл лыгъоравэтльэн ынкъам русильин йилымил.
Клавдия Гэутваал
А'мын етти!

Кыргам


агтымайыӈкыльэн

калельыпчеӄалгын,

э'квырга-ым

нымытвальын

мурыгрээн эйгысӄык.

Гыткаӄайык

ӄынур плякыйӈыт

рэтэмин,


вэнлыги-ым

онрапъеквэ

гымыкӄача

пиӈкуткуркын.

А'мын етти!

калельыкэтльан

пычьэйӈэӈэв!

Рэӄулымӈэ,

эчвэра-ым

рамӈычгэче

амноӈрамкэты!

А'мын етти!

Вертолётык

эвын таръэнӈыгъэ.

Ӄэйвитык-ым

ятыӈӈогъат

эккэӄэгти.

Тиркыгиӈ
Тиркыгиӈ Сергей Александрович пэлӄэтгъи ӈутинэлек Эквыкыннотык. Гъурэтлин ытлён О’мваанкэн эмнун’кы 1949 гивик. Гэкэлиткулин Благовещенскыкэн художественныкэн училищек. Ынанъыттъыёлкэнат ынинэт стихыт гакалейпатленат газетак «Советкэн Чукотка» 1973 гивик. Яачы гакалейпатленат округкэнат ынкъам Магаданкэн областякэнат газетак ынкъам журналык «Дальний Восток», «Наш современник», альманахык «На

Севере Дальнем», сборникык «Пою тебя, Чукотка», «Северное притяжение», «Озябший меридиан», «О Севере песня моя», ӄутти.

1980 гивик Магаданык гэтэйкылин ы'ттъыёлкэн ынин кэликэл «Лети, мой день» русильин ынкъам лыгъоравэтльэн йилымил. 1995 гивик газетак «Мургин нутэнут» гакалейпатлен ынин басня лыгъоравэтльаелымэл «Калготкэ-пэпэӄылгын ынкъам ӄутти гынникыт».
О'равэтльа лыгэнӄуну ылёӈэт
О'равэтльан

Нымытывальын

Лыганэркын.

Рэӄу лыганэркын?

Ръэнут ӄрирыркынин?

Рэӄу энарэрыркын?

Ипэ н'отӄэн гаймычьын! –

Аӈӄы.


Ӈэгти.

Йильэт


тынупык

увичвыльыт... К’эргатыльын

ы'лёӈэт...

Гыт-ым риквъэ: тъэркин!

Лыгэнӄуну гынан-ым

ръэнут?!
Ӈэргэр


Айгысӄэпы

Кыгыйгыръо.

Въэгти гапэтатленат.

Илетыркын

Энвилкэ.

Инъэ


Тинтин

Ӄмилкин


Тэнтик

Выргыргэркын.

И'тут

гаглеты


омнотагты

Риӈэркыт.

Пынныӄулин

Галгэн


Урвилеркын

Капчачеты

Гымнин

Лиӈык.


Специальное приложение к газете «Крайний Север». Ответственный за выпуск Иван Омрувъе. Заказ № 2. Тираж 998 экз.от 5.10.2001 г

«Чычеткин вэтгав» («Родное слово»)

5, 08.08.1995


Специальное приложение к газете «Крайний Север» на языках народов Севера
С. 1
9 авугстам – ымнотаеквэкэн ылёӈэт тъарваратыргэн.
Ымыльынотаеквэк варкыт нымкык’ин тъарвараттэ. Мытвынат

Айгысӄыӈӄачкэнат. Янор ӄулинутэкинэт. Ынӄэн индейцыт (Америка, Скандинавия), алеуттэ (Командоркэнат илирти), айванальыт (США, Канада, Гренландия), саамит (Норвегия, Швеция, Финляндия). Тъаръоравэтльальыт ынӄэнат тывъёттэ вараттэ? Индейцыт – 940 тысячтэ,

айванальыт – 56 тысячтэ, саамит – 52 тысячтэ, алеуттэ – 6,5 тысячтэ.

Россиякэн Федерацияк Айгысӄыӈӄач нымытваркыт 26 тъарвараттэ.

1989 о'равэтльарылгатгэвэк гатваленат: алеуттэ – 700, долгантэ – 6900,

ительментэ – 2500, кетыт – 1100, танӈыт – 9200, мансит – 8500, нанайцыт – 12000, нганасантэ – 1300, негидальцыт – 600, ненцыт – 35000, нивхит – 4700, орокит – 200, орочит – 900, саамит – 1900, селькупыт – 3600, тофалартэ - 700, удегейцыт – 2000, ульчит – 3200, хантыт – 23000, чуваныльыт – 1500, лыгъорвэтльат – 15000, эвенкит – 30000, энцыт – 200, айванальыт – 1700, юкагиртэ – 1100. Лыгъоравэтльат Чукоткак 1989 гивик гатваленат 11.914, игыр – мачмыкыӈ.

Тъарвараттэ Айгысӄыӈӄачкэнат РФ гэнчеэкэвлинэт ӈотэнорганизацияк:

1. Ассоциация коренных малочисленных народов Севера, Сибири и

Дальнего Востока Российской Федерации.

2. Депутатская Ассамблея малочисленных народов Севера, Сибири и

Дальнего Востока.

3. Международный Фонд развития малых народов и этнических групп.

4. Фонд выживания, развития экономики и культуры малочисленных народов Севера.

5. Международная Лига малочисленных народов и этнических групп

6. Фонд малочисленных народов Севера.

7. Ассоциация автономных округов РФ.

К’утти.

Татьяна Емельянова, заведующая отделен округкэн библиотекакэн.



Виилыгтык торгынан льуркыниткы айванальыӈав Лемма Откэ, микын энмэч 73 элеӈитти. Ытлён у’рэтыльын Янраӈайык Чукоткакэн районкэн. Лемма Магометовнана рымэйӈэвнинэт мытлыӈыргатрэ

ӈээккэт ынкъам ыннанмытлыӈыргатрэ ытлювъёӄагтэ.


Читайте в номере

9 августа - Международный День малочисленных коренных народов мира. Об этом 1-ястраница номера. А на 2-й странице о своём роде рассказывает работник окружного управления культуры Светлана Ранау. Бюджет округа – тема размышления депутата Думы Чукотки Григория

Тынанкергава. Это материал 3-й страницы. На следующей, 5-й странице, Пётр Омрынто пишет на этот раз о советах отца. В номере также

представлены юбиляры-земляки, этнопедагогикачукчей, опубликованы сказки и загадки эвенов на их языке, разнообразная информация.


С. 2
Нутэтумгыт

Вапъайынройгыӈавэгым
Гым гъурэтигым Мэйӈыпилгынутэк, Ваамычгык ӄача, энмэн

Вапъайынройгык. Нивӄинэт, гымнин ытлыгын гэпкирлин Тъаляльэпы. Гымнан лыги тылгыцын, эвын мургин ытлыгын тальамаальо гэнъэтлин. Ынӄэн гаялгынморэ Рыннатанмылгэты. Эвын ынкы тыльоӈӈонат – тамаальо нинмури.

Ытлыгэ нэнатвык’эн, энмэн тэленъеп нытваӄэн эмэйӈыкыльин чиниткин ӈэлвыл. Ынкъам янор ынанъыттъыёл ынпычакэттомгын Э'утваал

еп ӈээккэӄэю вама гамголен ӄоральатык. Ытлён мэйӈывинцэтыльу ӄорагынцэтык нитӄин, наӄам еп энинэльыкэ нытваморэ.

Лыги тылгыцын, эвын ынкы Э'утваал гантыёльатлен, вэнлыги-ым чеэкэй нытваморэ. Ӄол нинмури, ымыльо нумэкэнмури, лыгэн-ым чаёма

рэмкын нымгоӄэн тэлеӈкинэткук.

Э'утваалына ыммэмы нинивӄин:

– Гынан лыги лыӈыцын, ӄол мытинмык – галгэёо'ръолен, ӈэлвыл

нэналвавморэ льук, гатымӈэвлен?

Ытля-ым нивӄин:

– Ии, ынӄэн-ым тыкэтъоцын, ӄравӄэтчаръогъэ, люут ӈээккэӄэй Э'утваал, мэӈӄо ытлён кытгынтыпкэргъэ, иквъи:

– Татай, мургин ӈэлвыл ӈайыткынык гэнъэтлин. Наӄам льэлеӈкы йъацатунмык нылгэгтъылятӄэн, нылвавӄэнат ӄорат ватапльок. Ынкъам ынпыӄоратачымӈата ӈэлвыл гэныттэвлин ӈайыткынэты, ынкы элелӄыткук нэвииӄинэт.

Ынкъам ытлыгэ к’ынур татлыгнэн ытля:

– Ии, ынӄэн-ым ӈанӈээккэӄэй ынӄо ӈалвыльэпы пыкэрма

ӄоръачоолгыткынык гаралелен ӈайыткынгыпы талваяраӈӄачагты.

Итык-ым гымнан эльукыльинэт ӄоръачоолгыӄагтэ, нивӄинэт, ковлёкы вальыт. Ӄулин ытлыгэ гэӈээккэтэ ныныттувӄинэт ӄорат. Нивӄинэт, мургинэт ӄорат ныттыгытлиӄинэт. Ынкъам пууръу ытци ӄонпы эчвэрагыргын, ӄэлюӄ-ым ӄынут нысолёӄэнат, ӄынур-ым аӈӄапаӄайкэнат мыцот нынуӄинэт. Ӄымэл-ым ынӈин вальыт ӄорат пылӄымляльыт, ымыӄитъымыльыт. Ымы элек цъоранма, мцанма лёӈатӄата нитӄинэт. Таӈӄонпы гэмгээлек ӈэлвыльыт нагтатӄэнат аӈӄачормэты, ӄээӄын нылгитэӈыниквичетӄинэт. Киткит-ым, нивӄин ытлыгын, цычыгайылгав эвнэниквичевкэ, миӈкри ӄун цъоратык ымы кэлилет ныӄонпыӈавӄэнат ынкъам нытъылыӈӈоӄэнат ӄорат. Ынӄо тэӈыниквичивэтыплыткук ынцаӄ амноӈыӈӄачагты ӈэлвыл нынэквэтэвӄин, эмэлкэ ӄынут нинэнвиивӄинэт тыӈэльыт вытвытӄагтэ, лыгогтыт, ынӄэнат мачамаляӈэт нынуӄинэт. Ынӄо ынанчеръогты ныкитэ, энмэн ватапычьа ы'лё ӄынут энмэч нынэймэвӄинэт пыӄароттык, ныкитэ-ым ватапа.

Лыги тылгыцын, ытлыгын таӈычьыгыргын пыӈылтэтльан палёмтэлык. Мургин тэленъепкин ӄорагынцэтгыргын нэнатвыӄэн. Гым-ым янот чит нъэӄэлиӈэтигым ӄорагты, ӄэлюӄ нылгинымэйыӈӄинэт, гым-ым

ныппылюйгым. Ымыӈ ӈан вээнтыльыт э'ӄэлиӈу нинэлгигым, цыпэт

ӄынут линлиӈ ныкамагцаӄэн. Ытльата-ым нинивӄин: «Ӈээккок, аны

ынӄэн ауӄагтэ, ӄыкоргавыцын». Игыр вай, ӄытлыги, тэвыӈӈогъак, ӄэглынангэт, мургинэт ауӄагтэ пэнинэт коргавыльыт, мургинэт ватомгыт, винрэтыткульыт, ӄэлюӄ имыцъэнут амӄорайпы мургин гантомгавлен – тэйӈэтти, эвиръыт, кимитъыт, лыгэн-ым имыцъэнут.

С. Ранъав, мигчитльэн округкэн управлениен культурэн.

Виилыгтык: Светлана Ранъав.


Ръапыӈыл?
Ӈэлвыльыткук Чаакэн районкэн гырокы гъурэтлинэт 12643

ӄэюут. Ынӄэн 67,2 процентат. Совхозыткойпы янотыльо гитлин «Певек», фермергыпы - «Ичунь», миӈкы варкыт ӈирэӄ бригадат ӄорагынрэтыльэн.

Районык 1 июлык 1995 гивик гэгынритлинэт 45851 ӄаат. Ынӄэн тъарыӈ кытуркинэк.

* * *


Ӄытрык (Лаврентия) ынпыянва нымнымкин ынкъам ынкэкин администрацията вэтгаво гэлгылин вавылгыгыргын археологырык рээн. Археолога нымкыӄин гивиӈитти тэлеӈкинэт нымытваванвыт

нэргыткуйвыркынэт, льоёттэ ынкы гаймычьыт нэнэквэтэвыркынэт танӈынотагты, наӄам ынӈин эркуркэ. Эвынӈуткэкинэт нымытвальа унмэкэвку нэлгыркынэт ынӈин ивынэтыльэтыльыт чукоткальэты.

* * *

Игыр рэмкын тэӈкэквъи, титэ рыпаавыркыт мэгчерынво рытык нымкыӄин предприятият. Тэкэмынӈин ритлегъи совхоз «Большевик» Чаакэн



районкэн. Ынӄэн еп декабрык 1994 гивик. Наӄам ынкы ӈоткатагнэты совхозкэн мэгчерынвык рылгытваркыт директор ытри главный бухгалтер.

Корр. «КС».


С. 3
Ӄэтэв гэккэмури (гэӈээккэмури)

Тайын – Запрет
Иа'м валята энанкалыровыткоркын?! Нытайыӈӄэн.

Чычеткинэт увиритти (души умерших) гаймаӈэн (юрэӄ) рэнйиӈынэт.

Т.е. нельзя тревожить души умерших родственников. Грех на душу не бери, указывая на что-то, кого-то ножом. Они (души умерших) могут вернуться и забрать кого-нибудь из родных.
Кычгэпыт – загадки
1. Ынанмаӈэн лявтыткынык нуттынӈэӄин? (Ӄораӈы, вопӄы, нырыннынӈаӄэнат – олень, лось)

2. Мэӈин ӈирэче нъурэтӄин: янор ярачыко, яачы – вытку чинит? (Ӄайгатле – птенец)

3. Тэлвээлек пэнин и'ӈӄитыльын. (Ы’ттъын – собака)

4. Мимлычыку нылгэнымлыӄэн, рытрилык нотасӄыткынык – игырӄэй

илюкэ нынъэлӄин. (Ыннээн – рыба)

5. Яраӄай еӄата рычимэвнин, ынкы ӈытогъэ, тэӈвытку ӈаргынэн льунин.

(Ӄайгатле – птенец)

6. Гынник, эмнуӈкин, ватапа нытэйӈэтӄин. О'равэтльата нинэгынритӄин, ялгытык нэнаяаӄэн. (Ӄораны – олень)

7. Ынӄэн - мургин тэйӈэт, эвиръын, яраӈы чама лейвинэӈ.(Ӄораӈы – олень)

8. Амынгыка, а'лыгатгака нытэминӈыӄин тараӈкы. Ръэнут? (Гатле – птица)

9. Мэӈин ымльаляӈэт ныйылӄэтӄин, вытку гырокы нымгэсӄин? (Кэйӈын – бурый медведь)

10. Мэӈин льэлеӈръунэӈу нэлгэръэпыӄэн, элеръук-ым чевароэръа нинэлпууръыӄин? (Мэлёталгын – заяц)

11. Микын умкыт лявтыткынык нынӈэӄинэт? (Ӄорэн рынныт – рога оленя)

12. Льэлеӈкы ынӄэн таӈымыльэты нилгыӄин, ытръэч налгыӈойӈыткын

нувӄин. (Эмчьачокалгын – горностай)

13. Рэӄин яраӄай ковлёкы нытэйкыӄин тымӈэнотак, ӈаргын, оттыткынык, наӄам эрэтэмкэ, атытлыка? (Кытчыгъёлгын – гнездо птицы)

14. Нымкыӄин тытыл, наӄам а'ӄантоӈ. (Купрэн – сеть рыболовная)

15. Амынгыкыльэн, агыткакыльэн, наӄам мэчынкы нальэӄатӄэн, ӄырым

ныпылӄэтын. (Ыннээн – рыба)

16. Агыткака ныкытгынтыръоӄэнат. Мимыл ыргин ваны. (Ынныт – рыбы)

17. Пытӄытакалгыт ӄонпыӈ чеэкэй рэлеркыниӈыт. (Гынникин гыткат – ноги зверей)

18. Ръэнут мимлычыку ныкоргъав нувичвэтӄинэт, нотасӄыткынык-ым

нувъиӄинэт? (Ынныт – рыбы)

(Е. Пимоненкова. Лыгъоравэтльэнгыттапъёчгын. Магадан, 1993)


Нинъэйвыт – Заповеди (поучения, советы)
1. Еп майӈанма нэнэны, нунтымъэв ытлён ӄынинъэйвыркыниткы.

Ынкъам ытлён мэйӈэтык, э'чгынрэ эвнивкэ тури: «Мэкына ытлён гэнаглятлен?»

2. Кыевинэӈу ӈаргынэн ӄыгитэсӄивыркын. (Приучали тем самым к наблюдательности) .

3. Нотайпы чайвыткома (нотагчема), ӄулильэтычьэтэ ӄитыркынитык, эвытлым ӄытипъэйӈэркынитык. Э'ӄэгынник ӄырым ӄолегты ныетын.

(Поучение, наставление типа: бережёного Бог бережёт)
Редактор вкладыша Иван Омрувье.
Чукоткакэн автономныкэн округ

«Ыяакэн Эйгысӄын» № 4 (27), 23 апрелык 2004 г.

Тайкыё газетак «Крайний Север»,


С. 1
Тымн'ъэттъывъе

24 апрелык ынин, Ольга Дмитриевнан, о'ратъылён'эт. Ытлён гъурэтлин

нымнымык Рыркайпиян Чаакэн районкэн (игыр - Шмидтыкэн). Ынкы гэкэлиткуплыткулин 4-к'ав классык, ынк’оры гэкэлиткулин Пээкик, мынгытгэвэкалеткоран гэплыткулин Хабаровскик, ынкы яачы гамголен кэлиткук мединститутык.

Гамэгчерымголен Тымн'ъэттъывъе 1958 гивик чычетнутэк врачо. Мытлын'эн гивин'итти мигчирыплыткук терапевто Чукоткакэн округкэн маляврак, гамголен кэлиткук клиническыкэн ординатурак, вальын Первый москвакэн орденыльын Ленинын мединститутык нынныльын Сеченовын (1963-1965). Ынн'ингивиткун'ит Анадырык гэтэйкылинэт поликлиника, кмин'эткин отделение, тан'ын' гэтчылин энанмаляватгыргын, гамэгчерымголенат к'утти инэнмэлевэтыльыт. Ольга Дмитриевна

Тымн'ъэттъывъе гатвын'н'олен к'ол ынангыёлчьо терапевто округык. Ытлён гэльулин заведующино терапевтическыкэн отделениен округкэн малявракэн. 1973-1974 гивиткун'ит Ольга Дмитриевна Тымн'ъэттъывъе гитлин

главный терапевто округэн, 1975 гэвэтагнэпы-ым гитлин заместителё главный врачен округэн.

1970 гивик ытлён гэнъэтлин Заслуженный врачо РСФСР. Гинэнпиривлин медаля «За трудовую доблесть», юбилейныкэн медаля «За

доблестный труд. В ознаменование 100-летия со дня рождения Владимира Ильича Ленина», ытлён «Отличник здравоохранения».

Игыр Ольга Тымн'ъэттъывъе итыркын заведующино поликлиникак УВД Анадырык, председателё Советэн ынпыянвэн, вальын Ассоциацияк тъарваратыргэн Чукоткакэн, к'итпыльэтыркын эвынмигчирык ынкъам общественныкэн вагыргык.

Газетамэгчетльа нэтэнк'итпын'ыркын Ольга Дмитриевна, микын 24 апрелык о'ратъылён'эт.

Виилыгтык(н'ачгэпы мрагты): рэмкыльын Канадайпы, профессор университетэн Манитоба Кью Янг ытри Ольга Дмитриевна Тымн'ъэттъывъе.

Виилыгтын Михаил Гермашовын.


Ръапын'ыл?
– Мартык-апрелык Анадырык гэрэмкыльэтлинэт н'ирэк' овэчвынкалыровкэнат ансамблыт – Беринговкэн районкэн «Олененок» (нымнымгыпы Элк'этвээм) ынкъам «Рыркы» - Шмидтыкэн районкэн (нымнымгыпы Рыркайпиян). «Рыркы» гэк'итпыльэтлин гыёлчетынвык «Юные дарования Чукотки», мин'кы ынкэкинэт н'ирэк' артистыт гинэнпиривлинэт диплома гыюлетыльыт овэчвынкалыровкы. Н'ирэк' ансамблыт гаконцертыленатУгольные Копик, учрежденияткок Анадыркэн, гатваленат репетициянвык Государственныкэн лыгъоравэтльэн-айванальэн ансамблен «Эргыръон», говэчвынкалыровленат кынмал Тавайваамык к'олеансамблыткок рээн ынкъам гичиву гэлгылинэт анадырыльа ынкъам

тавайваамыльа.

– Мартык нымнымыткойпы Анадыркэн районкэн гэлейвылин Анадыркэн эргыпатыльын грапчакэн ынкъам млявкэн ансамбль «Чукотка», мин'кы инэнлельу итыркын Игорь Кузьмин. Ансамбль гатвален Красненок, Усть-Белаяк, Варээн'ык ынкъам 9-к'ав к'орагынрэтбригадак МУП СХП «Имени Первого Ревкома Чукотки». Овэчвынкалыровыльыт коргаво ынкъам гичиву гэлгылинэт нымнымыльэ ынкъам к'орагынрэтыльа. К'оныры аны ынк'эн ансамбль пэнин лымынкы овэчвынкалыровыльын, ныгъюлк'ин, нак'ам нын'инк'ин – артисто итыркыт ымы кэлиткульыт а'ачекыт ынкъам н'эвыск'этк'эгти.

– Апрелык Анадырык гатвален гыёлчетгыргын кэлиныгйивэтыльин

«Учитель года-2004». Лыгъоравэтльэн ынкъам айванальэн чычетйилык гыюлчьу кэлиныгйивэтыльу жюритэ гатвылен Льурэкин калеткоракэн кэлиныгъюлевыльын'эв Ирина Йильэн'н'ы.

– Майык (талпын'н'ок йъилгын) Анадырык ратвагъа энмэч мытлын'к'ав литературныкэн конкурс (гыёлчетгыргын) тэкэлин'ыльин - поэтэн, прозаикэн, лымн'ылгэчельэн. Ачгыта ратвагъа семинар н'иныльин ынкъам моольэн тэкэлин'кы. Морыкы пыкирыльылк'ылти писатель Юрий Рытгэв, к'утти тэкэлин'ыльыт мурыгнутэкин. Игыр жюрик вальа накалевэтгавыркынат тын'эвыёттэ конкурсынвэты кэлит. Ынкы к'ымэк н'ирэк'ликкин – Магадангыпы, Паакэйпы, Угольные Копийпы, к'утти нымнымыткойпы Чукоткакэн ынкъам Эйгыск'ыкин Россиен.



Достарыңызбен бөлісу:
  1   2   3   4   5   6   7   8   9   10   11


©kzref.org 2019
әкімшілігінің қараңыз

    Басты бет