Қарағандыда жедел жәрдем жүргізушісін соққыға жықты деп айыпталған Нұрболат Дәкебаев сотта күтпеген мәлімдеме жасады. Бұл туралы Stan.kz ақпарат агенттігі хабарлайды. 

Фото видеодан алынған

Қарағандыда жедел жәрдем жүргізушісін ұрып-соғу ісіне қатысты басты сот отырысы өтті. Сотта прокурор айыптау қорытындысын оқыды.

Прокурордың мәліметінше, 27 қаңтарға қараған түні Нұрболат Дәкебаев қоқыс тастау үшін көшеге шыққан. Екінші квартал шағын ауданындағы көпқабатты үйдің ауласында қоқыс контейнерлеріне өтетін жолды бөгеп тұрған жедел жәрдем көлігін көреді.

"Сотталушы жол жиегінде келе жатып, Берікқалиұлына балағат сөздер айтып, жедел жәрдем көлігін итеріп жіберген, қайтар жолда фельдшердің көзінше жүргізушіге тағы да балағат сөздер айта бастаған. Бұрылыста Берікқалиұлы Дәкебаевтың наразылығының себебін анықтау үшін көліктен түскен. Сағат 00:15 шамасында айыпталушы екі қолын жұдырықтап, Берікқалиұлының беті мен басынан кезекпен үш рет соққы жасап, одан кейін сол жақ қабырғасына бір рет соққы берген. Жәбірленуші миы шайқалып, жабық бассүйек-ми жарақаты, мұрын сүйектерінің жабық сынуы, беттің жұмсақ тіндерінің көгеруі диагнозымен Мақажанов атындағы емханаға жеткізілген", — деді прокурор Бекзат Әшірбеков.

Жанжалдың мән-жайын анықтаған кезде Нұрболат Дәкебаев күтпеген мәлімдеме жасады. Оның айтуынша, ол іздеуде жүргенін бесінші күні ғана біліп, бірден полицияға берілуге ​​бел буған.

"Мен әдепсіз сөздер айтқан жоқпын және жанжал болғанын қаламадым. Мен одан көлікті алып тастауын өтіндім. Бар болғаны 10 метр жерде үйдің тұрғындарының көлігі тұратын тұратын бос жер бар еді. Жанжалдан кейін ауданға жеке шаруаммен кеттім, құрылыста жұмыс істеймін. Әлеуметтік желіден іздеуде жүргенімді білген соң, берілуге ​​бел будым", – дейді Нұрболат Дәкебаев.

Еске салсақ, бұған дейін Қарағандыда ер адамның жедел жәрдем жүргізушісін соққыға жыққаны туралы жазған едік. Кейіннен күдікті ұсталып, екі айға қамауға алынған еді.


Автор: Даулет Байгонусов

Даулет — природовед и путешественник. Его увлечение природой Казахстана и исследования вносят неповторимый вклад в наше издание.